पुरुष फुटबलमा नेपालको शानदार सुरुवात
काठमाडौं (अनलाइन खेलखबर ) | नेपालमा जारी दक्षिण एसियाली खेलकुद ( साग ) अन्तर्गत पुरुष फुटबलमा नेपालले शानदार सुरुवात गरेको छ ।
मंगलबार आफ्नो पहिलो खेलमा नेपालले भुटानलाई फराकिलो जित हासिल गर्ने क्रममा ४-० ले पराजित गर्न सफल भयो ।
त्रिपुरेश्वरस्थित दशरथ रंगशालामा भएको खेलमा नेपालले शानदार जित हासिल गर्ने क्रममा नेपालको तर्फबाट कप्तान सुजल श्रेष्ठले २ तथा मिक्छेन तामाङ र अभिषेक रिजालले समान १-१ गरेका थिए ।
खेलमा नेपालमा पाँचौ मिनेटमा अग्रता बनाएको थियो । नेपाललाई कप्तान सुजलले अग्रता दिलाएका थिए ।
पहिलो हाफमा १-० ले अग्रता बनाएको नेपालले दोस्रो हाफमा अझ ससक्त हुँदै थप ३ गोल गरेको थियो ।
खेलको ५१ औं मिनेटमा नेपालले दोस्रो गोल गरेको थियो । टिमका लागि दोस्रो गोल कप्तान सुजल श्रेष्ठले नै गरेका थिए ।
त्यसपछी नेपालका लागि ६६ औं मिनेटमा अविशेक रिजाल र ७८ औं मिनेटमा मिक्छेनले गोल गरेपछि नेपालले भुटानमाथि शानदार जित हासिल गर्न सफल भएको छ ।
अब प्रतियोगितामा नेपालले आफ्नो दोस्रो खेल बुधबार श्रीलंकासँग खेल्नेछ ।