असार ३ (अनलाइन खेल खबर ) । सप्तरी क्रिकेट संघको आयोजनामा सप्तरीको राजविराजमा जारी सप्तरी प्रिमियर लिगको पाँचौ संस्करणको उद्घाटन खेलमा रुपनी राइडर्सले राजविराज द किंग्सलाई १५ रनले पराजित गरेको छ। 

पब्लिक विन्देश्वरी मैदानमा सम्पन्न खेलमा रुपनीले राइडर्स दिएको १५१ रनको लक्ष्य पछ्याएको राजविराज द किंग्सले पुरै २० ओभर ब्याटिंग गरेता पनि ८ विकेट क्षेतीमा १३५ रन मात्र बनाउन सक्यो। 

राजविराज द किंग्सको लागि बिक्रम सोबले सर्वाधिक ३४ रन बनाए। तृत राज दासले ३३ तथा अविशेक कार्कीले २९ रन बनाएता पनि जित्न पर्याप्त भएन। रुपनीको बलिंगमा फिर्दोश अन्सारीले सर्वाधिक ३ विकेट लिए जुन क्रममा ४ ओभरमा १९ रन खर्चिए। धिरज मण्डलले २ तथा जितेन्द्र मुखिया, अशोक मेहता र दिपेश कंडेलले १/१ विकेट लिए। 

यस अघि टस हारेर ब्याटिंग गरेको रुपनीले २० ओभरमा ६ विकेट क्षेतीमा १५० रन बनायो। उसको लागि प्लेयर अफ द म्याच समेत घोषित फिर्दोश अन्सारीले सर्वाधिक ६१ रन बनाए जुन क्रममा उनले ४९ बलमा ६ चौका र २ छक्का प्रहार गरे। रोहन बिकले ३३ तथा विकास दासले २० रन बनाए। 

३१ रनमा ३ विकेट गुमाएको अवस्थामा फिर्दोश र रोहनले चौंथो विकेटको लागि ६५ रनको साझेदारी गर्दै इनिंग्स उकासेका थिए। 

राजविराजको बलिंगमा बिक्रम सोबले २ विकेट तथा दिपेश सरदार, तृत राज दास र सोहेल खानले १/१ विकेट लिए। 

खेलको प्लेयर अफ द म्याच अलराउण्ड योगदान दिएका रुपनी राइडर्सका फिर्दोश अन्सारी घोषित भएका थिए ।

प्रतियोगिता अन्तर्गत सोमबार दुई खेल हुनेछन्। पहिलो खेलमा विहान ९ बजे रुपनी राइडर्स र बलान बिहुल सुपर किंग्स तथा दिउँसो १ बजे छिन्नमस्ता लाइन्स र बजाज खडक वारियर्स बीच प्रतिस्पर्धा हुनेछ।