काठमाडौं (अनलाइन खेल खबर )।धुर्मुस सुन्तली फाउन्डेसनले जनस्तरबाट चितवनस्थित रामपुरमा निर्माण गरिरहेको गौतम बुद्ध अन्तराष्ट्रिय क्रिकेट रंगशालाको निर्माणका लागि भरतपुर महानगरपालिकाले ५० लाख रुपैयाँ सहयोग गरेको छ ।

मंगलबार महानगरपालिका प्रमुख रेनु दाहालको उपस्थितिमा प्रमुख प्रशासकीय अधिकृत प्रेमराज जोशीले फाउण्डेसनका अध्यक्ष सिताराम कट्टेल (धुर्मुस)लाई ५० लाख रुपैयाँ हस्तान्तरण गरेका थिए ।

रंगशालाका लागि महानगरपालिकाले ४ करोड बजेट विनियोजित गरेको छ । त्यस क्रममा यो ५० लाख पहिलो चरण अन्तर्गत प्रदान गरिएको नगर प्रमुख रेनु दाहालले बताइन् । र बाँकी विनियोजित रकम महानगरपालिकाले क्रमश: प्रदान गर्ने उल्लेख गरेको छ ।

राष्ट्रको गौरवको परियोजनाको रुपमा रहेको यस आयोजनालाई चितवन महानगरपालिकाले पनि आफ्नो क्षेत्रको प्रतिष्ठा र चिनारीको रुपमा समेत लिएको छ ।

ब्यक्तिगत रुपमा पनि महानगरपालिका प्रमुख रेनु दाहालले रंगशाला निर्माण कार्यमा सुरुवाती अवस्था देखिनै अग्रसरता देखाएकी थिइन् । रंगशालाको महत्त्व बुझेर उनले धुर्मुस सुन्तली फाउन्डेसनलाई सुरुवात देखिनै सक्दो साथ र सहयोग पुर्याउदै आएकी छिन् ।

यता पहिलो चरणमा ५० लाख धुर्मुस सुन्तली फाउन्डेसनलाई हस्तान्तरण गरेपछि रेनुले सन्तोषजनक रुपमा रंगशाला निर्माण कार्य अघि बढेकोमा फाउन्डेसनलाई धन्यवाद दिएकी थिइन् ।

यस्तै महानगरपालिकाबाट प्राप्त रकमले आफूहरुमा थप हौसला र उर्जा मिलेको धुर्मुसले बताएका छन् । यस सहयोगले गर्दा अझ निर्णाण कार्यले थप गति लिने धुर्मुसको विश्वास रहेको छ ।